Ամեն գնով քաղաքական դաշտում երևալու համար ՔՊ-ն մեզ խանգարեց հաղթել ՀՀԿ-ին. Գևորգ Գորգիսյան
Աջակցիր «Ա1+»-ին
«Ա1+»-ի հարցազրույցը «Լուսավոր Հայաստան» խմբակցության քարտուղար Գևորգ Գորգիսյանի հետ
- Պարոն Գորգիսյան, «Լուսավոր Հայաստան» խմբակցությունը ներկա չէր ԱԺ հատուկ նիստին, որտեղ քննարկվում էր արտակարգ դրության ռեժիմը ևս մեկ ամսով երկարացնելու հարցը: Դուք որոշել եք այսուհետ բոյկոտե՞լ ԱԺ նիստերը:
- Եկեք անունը բոյկոտ չդնենք, դեռ քննարկում ենք մեր հետագա անելիքները: Եվ հարցը` որքանով է աշխատանքային մթնոլորտ տիրում Ազգային ժողովում, թե՞ պետք է գնանք պատրաստված` սաղավարտով ու բռունցքներով: Հույս ունենք, ինչ-որ արձագանք կարող է լինել, թեև դա շատ փոքր հույս է: Կարծես, նրանց վերջնական արձագանքը տեսանք` իրենք որևէ բանում մեղավոր չեն, մենք ենք սադրել, իրենք լավ են արել, որ խփել են:
- Ի՞նչ արձագանքի ակնկալիք ունեք:
- Որևէ ականկալիք չունենք, նիստերին մասնակցելու հարցը պայմանավորված է լինելու մեր առաջիկա անելիքներով ու ռազմավարությունով:
- Կարծում եք, նիստերին ձեր մասնակցությունը լարվածությո՞ւն է առաջացնելու, որ ասում եք, պետք է պատրաստված` սաղավարտով-բռունցքներով գնաք:
- Ես վստահ եմ, որովհետև եթե ինչ-որ մեկը չի գիտակցում իր արածի մեղք լինելը, դա անպայման կրկնվելու է: Մեզ հետ բանավեճից, բռունցքներից հետո, սկսեցին սպառնալ ՄԻ պաշտպանին: Այսինքն նրանց մոտ հիմա գլոբալ անպատժելիության մթնոլորտ է տիրում, ինչի հաջորդ քայլը շատ ուժեղ բռնապետությունն է լինելու: Բայց ես նրանց համար վատ նորություն ունեմ` մենք դա թույլ չենք տալու:
- Նրանք էլ ձեզ ու հատկապես ձեր խմբակցության ղեկավար Էդմոն Մարուքյանին են մեղադրում սադրելու մեջ: Իսկ վարչապետ Նիկոլ Փաշինյանը հարցնում էր, թե ինչո՞ւ էր Էդմոն Մարուքյանն այդպես արագ դեպի Սասուն Միքայելյանը գնում, քաղաքական երկխոսությա՞ն համար էր գնում:
- Ըստ նրանց մեկնաբանության, ես իրավունք ունեմ ծեծել ցանկացած մարդու, ում մեկնաբանության հետ համաձայն չեմ և ասել, թե նա ինձ սադրել է: Եթե այդպես են պատկերացնում քաղաքականությունը, ես նրանց համար ևս մեկ վատ նորություն ունեմ` քաղաքականության մեջ նրանք այլևս գործ չունեն անելու: Հասարակությունը տեսնում է, որ իշխանական գործիչները` ընդհուպ մինչև վարչապետը հերքում են ակնհայտ տեղի ունեցածը: Իսկ պարոն Փաշինյանն իր խոսքում հասցրեց մի քանի անգամ իրեն հակասել` երբ ասաց, թե զինաթափեցին պարոն Միքայելյանին: Ճիշտ է, հետո Անդրանիկ Քոչարյանը հերքեց, թե զինաթափում է, պատճառաբանելով, թե ծարավ էր: Ըստ պարոն Փաշինյանի` Սասուն Միքայելյանը զուգարան էր գնում, բայց նա բղավելով, թե «գլուխդ կցխեմ»` վեր կացավ ու գնաց Մարոքյանի վրա: Վերջինս էլ չէր կարող կանգնած մնալ և քայլեց ընդառաջ: Սա այլ կերպ մեկնաբանելն ուղղակի անբարոյականություն է:
- Իսկ նիստերին վերադառնալու համար ինչ-որ նոր ռազմավարությո՞ւն եք քննարկում:
- Մենք միշտ փորձել ենք լինել կառուցողական, ներկայացրել ենք նախագծեր, որոնք դեռ «Ելք» դաշինքով միասին էինք բերել`զարմանալով, թե քաղաքական մեծամասնությունն ինչու չի անդրադառնում այդ թեմաներին: Բայց դրանք ոչ միայն մերժվում են, այլև մեզ խիստ որակումներ են տրվում` ընդհուպ մինչև ազգի դավաճաններ: Հետո փորձում ենք բերել իրենք օրակարգում գտնվող հարցերի` վեթինգի, սահմանադրական փոփոխությունների մասին նախագծեր, որոնք նույնպես մերժվում են: Նրանք ցանկացած քննադատություն ընդունում են որպես թշնամանք, և այդ ագրեսիան իրենց մեջ գեներացնելով` հասցրեցին նրան, որ այլևս ընդդիմախոսությունը դիտարկում են որպես բարոյական և հոգեբանական բռնություն ու պատրաստ են դրան դիմակայել բռունցքներով:
- Հնարավո՞ր է, գարնանային նստաշրջանում նիստերին չմասնակցեք:
- Չեմ կարող ասել, դեռ քննարկում ենք, բայց մենք ԱԺ-ում մեր տեղը բաց չենք թողնելու, որովհետև քաղաքացիները մեզ ընտրելեն ընդդիմություն լինելու, խորհրդարանում իրենց ներկայացնելու համար:
- Իշխանությոնները «Լուսավոր Հայաստանին» համարում է նախկին նախագահ Սերժ Սարգսյանի փեսա Միքայել Մինասյանի ազդեցությունը կրող կուսակցություն, որը նրա ցուցումով է գործում:
- Անմեղսունակ են այն բոլոր մարդիկ, որոնք նման պնդումներ են անում: Եվ լրագրողների մասնագիտական պատքն եմ համարում, որ նման պնդումներ անողներից փաստեր պահանջեն: Հիշեցնեմ, որ մեզ հետ դաշինք կազմելու համար այդ սուտը Փաշինյանին չխանգարեց, որովհետև գիտեին, որ իրենք են դա հորինել դեռևս 2016թ. Վանաձորի ավագանու ընտրությունների ժամանակ: Ամեն գնով քաղաքական դաշտում երևալու համար այդ ընթացքում «Քաղաքացիական պայմանագիրը» խանգարեց մեզ հաղթել Հանրապետական կուսակցությանը, պայքարում էին մեր և ոչ թե ՀՀԿ-ի դեմ: Այդ ժամանակ փորձեցին դիմել բոլոր հնարավոր կեղտոտ միջոցներին:
- Այդ ամենն իմանալով` դուք ինչո՞ւ «Քաղաքացիական պայմանագիր» կուսակցության հետ դաշինք կազմեցիք:
- Նրանք էլ, մենք էլ հետևություն արեցինք, որ ՀՀ-ում չկա այնքան ընդդիմադիր դաշտ, որ ՀՀԿ-ն այնքան ուժեղ է իր ողջ ռեսուրսներով` օլիգարխներով, ֆինանսներով, վարչական լծակներով, որ մեր առանձին պայքարն անհնար է: Եվ երբ Սասուն Միքայելյանը եկավ ու խնդրեց դաշինք կազմել, մենք համաձայնեցինք ձևավորել ավելի մեծ ու ուժեղ մի բան: Կոնսուլտացիաներ եղան մի քանի ուժերի հետ, «Արամ Սարգսյանի գլախավորած Հանրապետություն» կուսակցությունը ևս միացավ ու երեքով մասնակցեցինք ընտրություններին: Մենք մի կողմ դրեցինք տարաձայնությունները և փորձեցինք միավորվել այն ամենի շուրջ, ինչը միավորում էր մեզ: Հիշեցնեմ, որ այդ ժամանակ «Քաղաքացիական պայմանագիրը» պնդում էր, որ մենք դաշինքը կնքելուց մեկ տարի հետո դառնայինք մեկ կուսակցություն:
