Բացել լրահոսը Փակել լրահոսը
Karen-Qocharyan
A A
Հարցազրույց Քաղաքականություն

Ամեն ինչ նախապատրաստում են հայտարարություններով՝ օրինակ «նշաձողը իջեցնենք»-ը․ Կարեն Քոչարյան

«Ա1+»-ը զրուցել է քաղտեխնոլոգ Կարեն Քոչարյանի հետ: Քաղտեխնոլոգը վ ֆեյսբուքում հետևյալ գրառումն էր արել․ «10 օր առաջ, Դավոսում Քիսինջերը, խոսելով ռուս-ուկրաինական հակամարտության մասին, ասել էր, որ Ուկրաինայի համար իդեալական կարգավիճակը կլինի Եվրոպայի և Ռուսաստանի միջև ընկած չեզոք տարածքը և Ուկրաինան պետք է հաշտվի տարածքային զիջումների հետ: Այսօր փաստացի նույնը կրկնել է Բայդենը:

Նոր աշխարհակարգը սարերի ետևում չէ...»։

-Պարոն Քոչարյան, սովորաբար աշխարհաքաղաքական այս կարգի գլոբալ փոփոխություններին նախապատրաստու՞մ են նման հայտարարություններով, թե՞ սա այլ նպատակ ուներ։

-Ընդհանրապես նախապատրաստելը հենց բաց հայտարարությունների տեսքով էլ լինում է։ Ոնց որ, օրինակ, «նշաձողը իջեցնենք»-ը։ Ամեն ինչ, այո՛, նախապատրաստում են հայտարարություններով, բայց ոչ ուղղակի տեքստով։ Ուղղակի տեքստ ոչ մի տեղ էլ չի լինում։ Չեն ասում չէ՞ ՝ մենք նոր աշխարհակարգ ենք ստեղծում։ Քիսինջերը ասում է՝ ես դեռ 8 տարի առաջ էի ասել, որ Ուկրաինան պետք է լինի նեյտրալ տերիտորիա Եվրոպայի և Ռուսաստանի միջև։ Դավոսում նա այդ ամենը կրկնեց և ավելացրեց, որ Ուկրաինան պետք է հաշտվի տարածքային զիջումների հետ։ Մեծ հաշվով, երկու օր առաջ Բայդենը կրկնեց դա։

-Ուկրաինայի նախագահ Զելենսկու հռետորաբանությունը արդյո՞ք այդ աշխարհակարգին նախապատրաստելու միտում ունի, թե՞ այն տարբերվում է։

-Զելենսկու հռետորաբանությունը, բնականաբար, պետք է տարբերվի, որովհետև նա առայժմ նաև ներքին լսարանի համար է խոսում։

-Ըստ ձեզ՝ այս նոր աշխարհակարգի փոփոխություններին ո՞ր երկիրն ավելի պատրաստ չէ և փորձելու է դեմ գնալ տեղի ունեցողին։

-Ես չեմ կարող ասել բախումների կգնա թե ոչ, բայց առաջին հերթին պատրաստ չի Եվրոպան։ Միացյալ Եվրոպան պատրաստ չի դրան։

-Իսկ ուկրաինացի ժողովուրդը՞ ՝ արդյո՞ք Ուկրաինայի պարագայում սա չի ենթադրում իշխանափոխություն։

-Չեմ կարող ասել։ Հիմա, գիտե՞ք, աշխարհը լրիվ փոխվել է։ Այդ նույն հարցով ես կարող եմ հիմա ձեզ դիմել՝ այդ նույնը ենթադրվում էր Հայաստանում, բայց չեղավ չէ՞ իշխանափոխություն։ Հիմա աշխարհը դարձել է ահավոր ցինիկ, պրագմատիկ։ Հիմա ոչ մի գիծ չկա։ Մենք հանգել ենք մի կարգի, որտեղ մի բան ասում են, լրիվ այլ բան անում։ Իրականությունը ավելի շատ կապված է հենց արածի հետ, այլ ոչ թե ասածի։

-Արդյո՞ք այդ նոր աշխարհակագի ձևավորման ճանապարհին դերակատարում ունեն նաև ռուսական և ուկրաինական բանակները։

-Յուրաքանչյուր երկիր, որն ունի բանակ, ունի ազդեցություն այս կամ այն չափով։ Պատահակ չի չէ՞, որ Եվրոպան հասկացավ, որ ինքը բանակ չունի ու բանակ է ստեղծում։ Դա էլ նոր աշխարհակարգի պահանջներից ելնելով է արվում։ 100 մլրդ եվրոն Գերմանիայի կառավարությունը հենց այնպես չհաստատեց։

-Հայաստանի և Արցախի շուրջ տեղի ունեցողը պե՞տք է համատեղել այս գործընթացների հետ։ Օրինակ՝ ընդդիմության այս երկարատև ակցիաները։

-Այն, որ դա նույն պրոցեսի շարունակությունն է, ես անգամ չեմ էլ կասկածում։ Բայց երբ ասում ենք նոր աշխարհակարգ, մենք չենք ասում, որ արդեն դա գծված է և կանոնները կան այդ աշխարհակարգի։ Այդ աշխարհակարգը նոր ստեղծվում է, ինքը նոր-նոր ծնվում է։