Արդյոք կվերացվի՞ դեղերի ներկրման ներքին մոնոպոլիան
ԱԺ Առողջապահության, մայրության եւ մանկության հարցերի մշտական հանձնաժողովում այսօր Առողջապահության նախարարի տեղակալ Սերգեյ Խաչատրյանը ներկայացրեց «Դեղերի մասին» օրենքում փոփոխություններ կատարելու մասին նախագծերի փաթեթը: ՀԱԿ պատգամավոր Լյուդմիլա Սարգսյանը հետաքրքրվեց՝ արդյոք սա կվերացնի դեղերի ներկրման ներքին մոնոպոլիան, թե ովքեր իրավունք ունեն ներկրելու ու սպառելու: Նախարարի տեղակալը նշեց, որ այս փաթեթի ընդունումը մոնոպոլիայի դեմ պայքարելու ձեւերից մեկն է. «Ամբողջ աշխարհում ընդունված է դեղերի ներկրման մոնոպոլիան, քանի որ ներկրողը պատասխանատվություն է կրում դեղի որակի ու անվտանգության համար»: ԲՀԿ պատգամավոր Վահե Հովհաննիսյանն էլ հետաքրքրվեց՝ արդյո՞ք օրենսդրական այս փոփոխությունները համապատասխանում են ԵՏՄ ստանդարտներին: Սերգեյ Խաչատրյանը նշեց, որ այս պահին ԵՏՄ շրջանակներում միասնական գրանցված դեղեր, կանոնակարգեր ու շուկա գոյություն չունի. «Հիմա գործընթացը նույնն է ինչպես ԵՄ, այնպես էլ ԵՏՄ պարագայում»: Առողջապահության, մայրության եւ մանկության հարցերի մշտական հանձնաժողովի նախագահ Արա Բաբլոյանն իր կողմից ավելացրեց՝ քանի դեռ ԵՏՄ հիմնական մոտեցումները մշակման փուլում են, ու դա կարող է տասնյակ տարիներ տեւել ու փոփոխվել, դեռ դժվար է ասել, թե որ երկրի մոտեցումն է ավելի խելացի ու լավը. «Դրա համար մենք մշակում ենք այն, ինչ միջազգային նորմերով ճիշտ է, այնուհետեւ մեր ներկայացուցիչը գնում է ԵՏՄ ու հիմնավորում է: Եթե նրանք ավելի խելացի բան ասեն, մենք կընդունենք, սակայն մենք հիմա աշխատում ենք մեր բնակչության անվտանգությունն ապահովելու համար»: Սերգեյ Խաչատրյանի վստահեցմամբ՝ մենք հիմա ավելի շահեկան վիճակում ենք հայտնվում այս օրենքի ընդունմամբ. «Մեզ մոտ դեղերի կլինիկական փորձաքննությունն ավելի մատչելի է, քան ԵՏՄ ցանկացած երկրում»: Արա Բաբլոյանը նաեւ ավելացրեց, որ, օրինակ, երկու հարյուր մլն-ոց բնակչություն ունեցող երկրի համար կարեւոր է ոչ թե ճիշտ հաշվարկը, այլ թե ինչ շահ ունի, իսկ ՀՀ-ում շահույթ շատ չեն հետապնդում, այլ ամեն ինչ անում են՝ ելնելով բնակչության շահերից:
