«Քոչարյանն ու Серый кардинал-ը սնանկացրին հայկական ավիաընկերությունը» (տեսանյութ)
Այսօր կառավարության շենքի դիմաց հերթական անգամ հավաքվել էին հաշմանդամություն ունեցող նախկին օդաչուները՝ պահանջելով 2006թ-ից իրենց չստացած թոշակները: Դեռևս 2 տարի առաջ վարչապետ Հովիկ Աբրահամյանը նրանց խոստացել էր մինչև մարտ ամիսը հարցին լուծում տալ, սակայն օդաչուների պնդմամբ՝ մինչ այսօր սայլը տեղից չի շարժվում:
«Այսքան ժամանակ ամեն անգամ գալիս, հավաքվում ենք այստեղ, բայց ապարդյուն: Վարչապետը այն ժամանակ հելավ, ձեռքը մեզ տվեց , ասեց տղամարդու խոսք եմ տալիս որպես վարչապետ՝ մինչև մարտ ամիս ձեր հարցը լուծվելու է, մենք էլ հավատացինք, ասեցինք դե տղամարդու խոսք է, վարչապետի խոսքն է, բայց ու՞ր ա: Մեզ խաբում են ու խաբում: Սրանց ուղեղին մենակ էն ա, թե ոնց երկար մնան իշխանության ու թալանեն էս ժողովրդին»,-վրդովված շեշտեցին օդաչուները:
Ինքնաթիռի նախկին հրամանատար Սեյրան Սարգսյանն էլ հիշեցրեց արդարադատության նախկին նախարար, իսկ այժմ էլ կառավարության աշխատակազմի ղեկավար - նախարար Դավիթ Հարությունյանի օրոք ընդունված օրենքի մասին:
«Այն անձիք, ովքեր աշխատանքի ընթացքում հաշմանդամություն են ձեռք բերել կամ զոհվել են, նրանք օրենքի 579 հոդվածի 16-րդ կետի համաձայն պետք է ստանան փոխհատուցում: Մենք այդ փոխհատուցումը մինչև 2006թ-ը ստացել ենք, բայց հետո օրենքը փոխեցին և այդ դրույթը հանեցին: Ռոբերտ Քոչարյանի հրամանով և серый кардинал Դավիթ Հարությունյանի ակտիվ մասնակցությամբ հայկական ավիաընկերությունը սնանկացրեցին ու մեզ թողեցին այսպես»,- նշեց Սեյրան Սարգսյանը:
Նախկին օդաչուները պահանջում էին նաև, որպեսզի Հովիկ Աբրահամյանը իրենց ընդունի, սակայն կառավարությունից օդաչուների պահանջին որևէ մեկն այդպես էլ չարձագանքեց:
